काठमाडौं । बाल यौन दुर्व्यवहारको कसुरमा दोषी ठहर भएका रामबहादुर बमजनलाई १२ देखि १४ वर्ष कैद सजाय हुने भएको छ। सर्लाही जिल्ला अदालतका न्यायाधीश जीवनकुमार भण्डारीको इजलासले उनलाई सोमबार दोषी ठहर गर्दै सजाय निर्धारणका लागि असार १७ गते पेसी तोकेको छ। अधिकारीका अनुसार, बमजनलाई १२ देखि १४ वर्षसम्म कैद सजाय हुन सक्नेछ।
मुलुकी अपराध संहिता, २०७४ मा १४ देखि १६ वर्षभन्दा कम उमेरकी बालिकामाथि जबरजस्ती करणी भए १२ देखि १४ वर्ष कैद सजाय हुने व्यवस्था छ। नेपालमा १८ वर्षभन्दा कम उमेरका व्यक्तिलाई बालबालिका मानिएको छ। यस उमेरसमूहका व्यक्तिको मञ्जुरी लिएर पनि यौनजन्य व्यवहार वा विवाह गर्न कानुनले वर्जित गरेको छ।
